EHANGANO lyokukalela po aailongi moNamibia lyedhina Student Union of Namibia (SUN) olya popi kutya omufekelwa moshipotha shekwatonkonga Lukas Tsamseb, ngoka a tseyika nawa ‘Irivari’, oku na uuthemba wokumona elongo, kutya nee oku na ondjo nenge ke na ondjo.
Irivari okwa ningi edhina moshilongo pehulilo lyomvula yo-2019, konima yokavidio a kwatwa e li kohi yondhungo ka li ka andjaganekwa nokwi ingaana komalungula. Lwanima Irivari okwa kala nokumonika koyendji mboka haya piti pomboloka yaShivelo ta landitha uushikependjewo osho wo okuhehela oshimaliwa aaniihauto taya ende po, noyendji oya kala taye mu kwata uuvidio nokuthaanekwa naye omathano, taya tula komalungula.
Omvula ya zi ko, konima sho epangelo lya nongele Irivari momapandaanda gaShivelo, okwa li lye mu tamekitha osikola okupitila muuministili wUuthikepamwe, Ekondjitho lyOluhepo osho wo Onkalonawa posikola yedhina Ondera Primary School moshitopolwa shaShikoto.
Omupresitente gwehangano lya-SUN, Simon Amunime, mEtitatu okwa popi kutya ehangano lyawo olya pyakudhukwa okufutila Irivari elongo moshiputudhilo shaanuunkulungu shedhina College of the Arts mOvenduka, molwaashoka oku na uuthemba we wokumona elongo.
“Mboka uuthemba wa shangwa mekotampango nongele omuntu ina monika ondjo, kapu na ngoka te mu indike a kuutumbe mongulusikola.
“Nanso (Namibia National Students Organisation) osho wo uuministili [wElongo] itaya vulu okuninga etokolo ngele omuntu nashune mosikola nenge ina shuna mo,” osho Amunime a popi ngaaka.
Ndhoka okwedhi popi sha landula sho uuministili wElongo osho wo ehanganokalelipo lyaailongi lyedhina Nanso oshiwike sha zi ko ya zi mokalungu kutya itaya popile edhiladhilo lya Irivari a shunwe mosikola sha landula sho a mangululwa mo mondjeedhililo iiwike iyali ya piti.
Uuministili wElongo owa popi nokuli kutya kapu na nande eindilo lyopambelewa lya thikithwa kuuministili opo Irivari a shunwe mondondo yotango.
Petameko lyomvula ndjika, Tsamseb okwa li a tulwa miityaka pamwe naafekelwa yatatu taya tamanekelwa ekwatonkonga, sho taku hokololwa kutya oya li ya hangene nokukwatonkonga okakadhona komimvo 18 momudhingoloko gwaDamara mOshivelo, sha ningwa mesiku lyomumvo omupe.
Konima sho a kala konima yekumba uule wiiwike ya konda pwiihamano,kansela gwoshitopolwa shaGuinas, omusamane Marthinus Kainda, okwa li a li a futile mo Irivari mondholongo noboloha yoo-N$2 000, nelalakano opo omufekelwa a shune kosikola mbala.
Irivari pamwe naafekelwa moshipotha shoka, oya tegelelwa ya holoke natango mompangu yaMangestrata gwaShomeya momasiku 16 gaMaalitsa.
Moonkundathana noThe Namibian oshiwike sha zi ko, omukuluntuwiliki muuministili wElongo, Sanet Steenkamp, okwa popi kutya kapu na nande eindilo lyopambelewa lya Irivari a galukile kosikola.
Ompito yomufekelwa gwekwatonkonga a shunwe mosikola mokati kaanona otashi nyenyetwa molwaashoka aakwashigwana otaya gandja ombedhi kepangelo kombinga yompito ye yokushunwa mo.
Steenkamp okwa popi kutya oshikumungu sha Irivari oshinene notashi pumbwa okukonaakonwa muule omanga inaa ku ningwa etokolo lya sha
Oomvula dhe kadhi shiwike molwaashoka ke na omikanda dhuukwashigwana, ashike nande ongaaka olopota yomakonaakono ngoka a ningilwa okupitila momayego ge, oye mu tengenekele pokati komimvo 17 nomimvo 21.
Omukuluntuwiliki okwa popi kutya, oomvula dhe ndhoka dha pitilila, otadhi vulu okukala yimwe yomwaambyoka tayi taliwa kuuministili kombinga yonakuyiwa ye melongo.
Steenkamp okwa popi kutya elelo lyuuministili olyo ashike tali vulu okugandja epitikilo netokolo lyomuntu e na oomvula dha pitilila, a shunwe mosikola.
Onkene okwa popi kutya Irivari ita vulu nande okushunwa mosikola inaashi kundathanwa nenge inashi pewa epitikilo kuuministili wElongo.
Amunime okwa popi kutya ye okwi ikwatelela komakankameno kutya Irivari omufekelwa owala ndele ina monika ondjo. Okwa popi kutya nonande ando okwa li a monika ondjo onkene ta vulu okupewa ehungomwenyo ye a vule okumona elongo.
“Omuntu ngoka omufekelwa ashike ndele ina monika ondjo. Nonande omuntu okwa monika ondjo itashi ti ne ekelwehi koombwa. Ota vulu okulongela egeelo lye nokugaluka. Aantu ohaya yi mondholongo, nokugaluka mo etaya pewa ehungomwenyo.
“Ndyoka etokolo tali kala po kutya nee Irivari okwa monika ondjo nenge ina monika. Otwa ningi etokolo ndyoka ongehangano. Otwa pyakudhukwa okufutila elongo lye mekwatathano noshiputudhilo [shuunkulungu],” osho a popi ngaaka.
Nondande okwa zimine kutya egaluko lya Irivari mosikola otashi vulika lye ete omaipulo nokwaamanguluka kaagundjuka mboka taya ka kala mokati ke, okwa popi kutya ehangano lyawo olya ningi etokolo opo li mu yambidhidhe.
“Oshinima shotango tatu lalakanene Lukas, ehungomwenyo osho wo onkalonawa ye yuundjolowele wopamadhiladhilo; nuuna tu wete kutya okuli nawa opo nee tatu mwe eta moshigwana. Inashi puka a shunwe mosikola,” osho a popi ngaaka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
